Tampisik
Forum Newbies
Offline
Kanatong tanan ining Butuan! Kadiyawon ta!
Posts: 28
|
mga kasuonan:
masawa nga bag-o nga tuig kaniyo nga tanan!
ang pagkapatsada atudon hong pigahinang nga balangay makapawaa hong kala-ay. bisan dakwa ang gasto pagpahinang kaniya patsaon pwerte kalisod ang mihilamit namo pagbatok hasta pagpakarga hong kahoy, piga no vale nada na lang ang tanan iyan duon nga hapit na mitibog ang forma hani nga balasi-an nga butuanon.
yaoy galaong nga ini capricho hong mga dato. matuod balitaw nga dato ang kamaasan hasta karayahan nga mga butuanon hadto. dato sila amo kay iyan taod buwawan nila hasta mikapahinang hani nga mga lokatod (sakyanan). ang pagdumdom o pagtad-om hong atomnga kasaysayan pandato? ngansi kay kung dato ang iban ta nga kasuonan nga butuanon pero pobre ba lagi ang pagbati nila hong mgampuraot o pobre? mas madiyaw pa tingali ang pobre diyan pilipinas hasta butuan kay mikadumdom pa hong iya nga kagahapon tapat (while) ang iban gapadayata lang disaon iban nga bansa kaamo saling kaskabil hani nga proyekto, madiyaw ra ba kung yaoy pigaduho nga kawdaa pagtubag hong ngayngaan nga mga piga kinahanglan hani nga trabaho. ang iban hinuon nga kama-atan nga kisayran nila wa bonakbonaki hong hakhak. imbis gakinahang lan nga taposon ta ini kay ato ba ini (kadiyawon ta), gapanghathat na ba hinuon hong tirada, gapangsamad hong mga dagaha! onhon ba paglisig hong dungog hong butuan nga pobre ba ang pagmahal ta kaniya?
di ba tanan isab kanato dato, yaon bay pobre, potahaw, mahingis ang batasan hasta mga madiyaw. di ta tanan matubag ang mga kabisgo hong butuan hasta kalibutan. one at a time, laong pa nila.
festina lente, make haste slowly.
ang mga pobre yaoy ga-oda kanila. iyang pigalaong nga mas madiyaw na lang nga ang pagagastohon hani itabang hong pobre, daan na ini nga sonata, wa gihapon misolba. si judas gusto ba nga ang agwa nga para kang kristo ipahatag kanila. pero si kristo mibaya nga idto ibanyos ngadto siki niya. kaisa da idto nga pagpa banyos pero hasta duon yaon pa ba gihapon ang gakabokatot hong kalisod. na, ngan kay ang mihinang ta para kanila? kada tuig kada oras yaon bay garepara hong ila nga mga pigakinahanglan, kuwang pa ba gihapon, wa miwaa, midoro na hinuon. ipadayon gihapon ang pagpa-agsa ta kanila.
ngansi matinga pa ba kita nga yaon sila nga kombos na ba kita ba tingali gani mikapapuraot kanila, kaamo doon magapanagonsilaw kita?
madiyaw gani nga yaon si art valdez nga gahikit hong samboo hong mga kalimathoo (mata) hong mga butuanon nga mi-amat (mibuta) hong pagmahal hong iya nga kasaysayan. huo, kiunhan kita niya. yaoy taga-impon (dream) ta hadto paghinang hong hong miyan hani nga lokatod pero poro da kita tabi, tabi, tabi nga way pagkatapos! ang pagkamalupok ta hilabi kadiyaw ang kalantayog (mas mataas pa kay hong niyog)!
powa (amang) kita pagtug-an hong kamatuodan hasta bungoo (deaf) hong ngay mihinang nga madiyaw hong iban!
iyan duon nga yaoy gapasingoo hani nga proyekto, yaon na isab magasaling tira. kuyagpis da kadiyaw ang hunahuna ta. uli kunu kamo ngani butuan, atuda kung yaon bay ikapagarbo niyo nga pigabilin niyo nga madiyaw dumdomon hong tanan hasta idtong mga bontanak niyo nga waa pa mitao.
ang iban nga lugar hilabi na disaon iban nga nasyon kadoro ang mga madiao bisitahan nga monuments and sites, natural hasta hininang hong tao nga mga kahodar (heritage). diyan butuan bisan sin-o na ang gamayor pobre gihapon. ang mga kapun-an ta diyan poro dato pero way pagmahal hong kasaysayan lakip kanila nga mimag-iktad tikan ngani (yaon na gahowa gowa). mitaod ang mga way pigapanglam-od. wa pay kasambuyatan hong kagahapon hong butuan.
iyan duon nga pigapabatyag ta lang ang hunahuna hong mga pilipino hilabi na hong mga but uanon nga tuni ang pilipinas (tungod hong butuan) yaoy mabook (colorful) maritime history diyan asya, ang iban ta nga mga suon nga dato magapangtudos na ba hinuon hong mga pigapanghinang para hong kakadyawan hong tanan (dato hasta pobre)!
minilyon na ang mga miwaa nga kawdaa, waa gihapon misapsing ang kinabuhi hong mga puraot kaamo isab ang kasaysayan ta impigapangkalipatan ta na lang hasta duon.
tilaw day kisayran hong taod nga gahowa diyan butuan, himila-an pa niyo ang mga gapabatyag hani? kung mikasayod kamo ngansi ba wa niyo pakangyata kami adeser kamo gapansimbowag tikan ngani? adeser isab kita mobowag diyan kalibutan, yaon kuntay mihinang ta nga mga madiyaw, di lang saling boroka, tabi, panlupok, kahingis... mas madiyaw pa nga pasawahon ta ang lagah hong ato nga pagka butuanon, pagtuo, pagkapilipino hasta pagkatao. itokay ta ang ilaw hong kasaysayan ta nga makinlaw!
kung madiyaw kamo mosowat o madiyaw ang mga pensada niyo, aber, hubada iyan hong buhat hasta makasugod o makapadayon kamo pag-agsa para hong tanan nga way kasina o pagpangipi! ma- antigo kunta isab kita mokaong hong "mea culpa, mea maxima culpa" para hong butuan nga kibiyan-an, pigakalipatan o wa ta akodiha.
lawig balangay... isuba ang mga butuanon (dato hasta pobre) paiyan disaon sagpod hong kalangitan!
luceat lux vestra coram hominibus...! (let your light shine before men...)
ang mga balangay hong butuan: kahodar hong tanan nga mga butuanon, tanan mga pilipino, tanan mga tao.
yaon bay mga balangay ang iban lugar hong pilipinas o kalibutan?!
ato ini, kadiyawon ta!
happy / hapay new year!
tampisik
(saludo ako hong gapangawa hani nga letrato, patsada! ang mga kawa ko yaoy pagkahanap kay celfon da ba ang pigagamit. di na magamit ang baterya hong kamera ko.)
|
Home
Pages: 
